Foto nga The Insider në YouTube, Nikita Uvarov.

Elena është një shtëpiake dhe jeton në një qytet të vogël rus jo shumë larg Moskës. Një të diel në mëngjes ajo dëgjoi djalin e saj 8-vjeçar duke bërtitur me krenari: “Mami, unë e vrava Putinin! Thjesht e qëllova në kokë!” Ajo u tmerrua.

Sigurisht, djali i saj në fakt nuk qëlloi askënd. Ai gjithashtu nuk e dinte se kush ishte Putini. Në fakt, ai po luante një videolojë në internet, ku njerëzit përdorin pseudonime për të marrë pjesë. Por frika e Elenës ishte autentike: në Rusinë e sotme, fëmijët ndëshkohen se thonë dhe bëjnë më pak se kaq.

Më 17 janar 2023, Gjykata e Lartë ruse la në fuqi dënimin me 5 vjet burg që Nikita Uvarov mori për lojën në Minecraft.

Siç raportoi Radio Liberty në shkurt 2022, Nikita dhe dy djem Denis Mikhailenko dhe Bogdan Andreev, ishin 14 vjeç kur u arrestuan në vitin 2020 në Krasnoyarskii Krai në Siberi. Në kohën e arrestimit ata kishin ngjitur një poster në një ndërtesë lokale të FSB-së (FSB është shërbimi federal i sigurisë në Rusi, një strukturë e zbatimit të ligjit që është pasardhësi i KGB-së) për të mbështetur Azat Miftakhov, një matematikan tatar-rus dhe aktivist politik. Azat ishte në paraburgimin e policisë në Moskë në atë kohë për dyshimin se kishte thyer xhamin e dritares dhe hodhi një granatë në zyrën e partisë pro-qeveritare. Ai ishte vetëm 26 vjeç dhe studionte për doktoraturën në Moskë.

Pas arrestimit të djemve, policia konfiskoi telefonët e tyre dhe më vonë pretendoi se kishte gjetur biseda, ku miqtë planifikonin të shtonin ndërtesën e FSB-së në lojën Minecraft dhe ta hidhnin në erë atje.

Hetuesit deklaruan gjithashtu se djemtë kritikuan FSB-në, lexuan libra të ndaluar, bënë fishekzjarre të bëra vetë dhe hodhën në erë në ndërtesa të braktisura në qytetin e tyre të lindjes, Kansk në krahinën Krasnoyarsk të Rusisë.

Ndërsa u filmua nga TV lokal gjatë gjyqit të parë në 2022, Nikita tha se ishte “mirënjohës” për të gjithë ata që e mbështetën atë dhe miqtë e tij.

Siç tha avokati i Nikitës për mediat lokale më 17 janar 2023, deri më tani ata kanë apeluar tre herë, por vendimi ka mbetur i pandryshuar. “Gjithçka që kërkuam ishte një dënim me kusht që ai të mbaronte dënimin jashtë burgut. Nikita ishte gati për atë që ndodhi. Familja kishte shpresë, por në situatën aktuale është joreale”, tha avokati i Nikitës, Vladimir Vasin.

Ditë para gjyqit të tij në 2022, Nikita dhe nëna e tij folën për Insider për trillimet në rastin e tij. Ekziston një faqe interneti kushtuar çështjes së adoleshentëve të Kansk dhe një kanal në Telegram. Nikita Uvarov do të transferohet në një burg për të rritur pasi të mbushë 18 vjeç.